到了冬天要适当进补，搿是老规矩了。所以，翻翻菜谱，看看各种冬令进补公众号，像煞样样侪想试一试：当归烧羊肉、山药炖牛肉、黑豆熟地鲍鱼汤……结果，目标还是锁定辣石斛陈皮烧鸭子。因为，翻翻冰箱，正好有朋友送个新鲜石斛、热天里向自家晒个陈皮，至于鸭子，就用翻出来个半只草鸡代替好了。
一直以为，能够随手拿冰箱里个存货烧出好吃物事个，才是真正个好主妇。所以，一份打扫存货个汤就迭能产生了：
先备料：半只草鸡，血水处理清爽，斩成块；鸡油假使有点多，剥伊下来，熬成鸡油，平常日脚炒炒青菜之类，邪气好；一小把石斛，汏一汏，去老根，剪碎；抽屉里还剩了一点点黑木耳，拿出来，热水发好，摆镬子里笃一歇；当年新鲜火腿切几片；葱、姜少许、陈皮一瓣汏清爽，备好。
接下去操作：镬子里放清水，鸡块摆下去，大火烧开，耐心耐向，撇清爽浮沫；石斛、黑木耳、葱姜、陈皮一道摆下去，大火烧开后，改成小火，烧40分钟左右，再拿火腿片放下去，再炖10分钟左右，就好了。
两个人个饭台子，一镬子鸡汤可以撑一天市面了：中浪向，有了香喷喷，黄澄澄个鸡汤，一碗白饭，一碟鸡油炒青菜，一盆四喜烤麸，肚皮勿至于吃得撑足撑满，也是可以乐乐惠惠了；夜到，剩下来个鸡汤热一热，再摆一把小青菜，冰箱里再翻点甜虾或者是虾干，一道烧成汤底，下两把银丝细面，夜饭也就迭能了。